Saturday, October 29, 2011

Ek khoobsurat or jazbaati ghazal by janaab Mayank awasthi sahab

Taron Se Aur Baat me kamatar Nahin Hoon Main
Juganoo Hun Isliye Ki falaq Par nahin Hoon Main

Sadmon Ki barishein Mujhe Kuchh To Ghulayengi
Putala Hun Khaq Ka Koi Patthar Nahin Hoon Main

Dariya-e Gham Me Burf Ke Tode Ki Shaql Me
Muddat Se Apane Qad Ke barabar Nahin Hoon Main

Uska Khayal Uski Zubaan Uske Tazkire
Uske Qafas Se Aaj Bhi Bahar nahin Hoon Main

Main Tishnagee Ke shahar Pe TukaDaa hoon Abra Ka
Koi Gila Nahin Ki Samander Nahin Hoon Main

Takara ke aaine se mujhe Ilm Ho Gaya
Kyon Aaine Ki Kirch Se Badhakar Nahin Hoon Main

Kyoon Zahar zindagi Ne Pilaaya mujhe Mayank
Wo Bhee to janatee Thi Ke Shanker Nahin Hoon main

Umda ghazal by Janaab Mohammad Azam sahab (Bhopal)

Jo ham se roz baDi khush dili se milte haiN
MuseebatoN meN wahi be-rukhi se milte haiN

Wo seedhe muNh nahiN karte haiN baat bhi ghar meN
Magar khuloos se baahar sabhi se milte haiN
...
Tunak mizaaj hai,aashufta sar hai ,khabti hai
Laqab kuchh aise hameN shayeri se milte haiN

Junoon,wahshateN, be-khaabiyaN,sanak ,sauda
Maraz kuchh aise hameN aashiqi se milte haiN

Talaash aaj bhi insaan ki hameN hai bahut
Agarche roz hi ham aadmi se milte haiN

Ata to aap hi karte haiN har khushi lekin
Tamaam gham bhi hameN aap hi se milte haiN

Ye un ka tarz-e-taghaful bhi khoob hai 'azam'
k jaise roz kisi ajnabi se milte haiN