Raat hum se hi na kaati gayi tanhayi ki.
tere gham ne to badi housla afzayi ki
kya zarurat hai use anjuman araayi ki
aa gayi raas jise zindagi tanhayi ki
mujhko har haal me takmeel-e-safar karna hai
humnashino meri adat nahi paspaayi ki
ghalib-o-meer ke mansab ko na pahucha koi
yu to logo ne bahut kafiya paimayi ki
aap bhi mere ta-alluq se zabaa"n band rakhe
main bhi koshish na karu apki ruswayi ki
unke deedar se mehroom na reh jau kahi
ae khuda umr bada de meri binaayi ki
paishay-e-charagari kher ho teri lekin
rasm duniya se na uth jaye masihayi ki
gham ne dastak hi nahi di mere dar par AHMAR
balke bazabta tajdeed-e-shanasayi ki.
is ghazal par sabki khas tavajjo ki guzarish hai .shukriya
No comments:
Post a Comment